दुनिया में मोर बजरंगी के

दुनिया में मोर बजरंगी के नाम बड़े हे ।
नाम बड़े हे दुनिया में  काम बड़े हे।
दुनिया में मोर बजरंगी के नाम बड़े    हे ।

राम नाम दिन रात जपत हे करे राम के काम ।
भरत सही पिरोहिल राम के ह्रदय लगाये राम ।
सूरज को लीलने  वाला के नाम बड़े हे ।
दुनिया में मोर बजरंगी के नाम बड़े हे।

अवध पुरी में बंदर बन आगे भोला  के अवतारी ।
अपने बनगे बंदर शिवजी अपने बने मदारी ।
नाच के राम रिझइय्या के काम बड़े हे ।
दुनिया में मोर बजरंगी के नाम बड़े हे।

ब्राह्मण बनके मिले राम  से  होइस जब बनवास।
बाली के ड़र मा रिष्यमूक मा सुग्रीव करे निवास ।
राम सुग्रीव के मिलईया  के काम बड़े हे ।
दुनिया में मोर बजरंगी के नाम बड़े हे ।

सीता के पता लगाये खातिर कइसे समुन्दर नापे।
रावन के तँय बाग उजारे दानव दल हा कांपे ।
पूछी में  लंका जलईया के काम बड़े हे ।
दुनिया में मोर बजरंगी के नाम बड़े हे ।

विभीषन संग करे मिताई लंका के भेद ला पाये ।
माँ सीता के गोद मा मुँदरी  ला तंही गिराये ।
सीता के दुखः हरईया के नाम बड़े हे ।
दुनिया में मोर बजरंगी के नाम बड़े हे ।

माता के आगू हाथ जोड़ के अपन पता बताये।
राम दूत मैं मात जानकी हनुमत नाम धराये।
सीता के पता लगईया के काम बड़े हे ।
दुनिया में मोर बजरंगी के नाम बड़े हे।

शक्ति बाण लगे लक्ष्मण ला रामा नीर बहाये ।
द्रोणागिरि पर्वत के संग मा बैद सुखेन ला लाये ।
लखन के प्राण बचईया के काम बड़े हे ।
दुनिया में मोर बजरंगी के नाम बड़े हे ।

कतका तोर मँय काम गिनावंव कतका भक्ति बतावंव ।
राम चरण संग बजरंगी मँय तोरो चरण मनावंव ।
मोरो दुखः हरईया  के काम  बड़े हे ।
दुनिया में मोर बजरंगी के नाम बड़े हे ।
नाम बड़े हे राम जी ओकर काम बड़े हे ।।
दुनिया में –

केवरा यदु “मीरा “

(Visited 1 times, 1 visits today)