हमर गंवई गाँव(Hamar gavai gaav)

1
आबे आबे ग सहरिया बाबू
हमर गंवई गाँव
गड़े नही अब कांटा खोभा
तुंहर कुँवर पांव
आबे आबे सहरिया बाबू
हमर गंवई गाँव।।
2
गली गली के चिखला माटी
वहु ह अब नंदागे।
पक्की सड़क पक्का नाली
हमरो गांव म छागे।
लइका मन बर स्कूल खुलगे
जगाथे गाँव के नाव।
आबे आबे ग सहरिया बाबू
हमर गंवई गांव ।।
3
नरवा खड़ म मील बनाहे
बज -बजाथे खड़ ह।
गोला गोला  पेड़ कटवाहे
दिखे नहीं कोयली ह।
कुँआ बउली कोन पूछे अब
बोर खनागे गाँव।
आबे आबे ग सहरिया बाबू
हमर गंवई गाँव।।
4
पहिली के जंगल ह छटागे
बघुवा भालू ह भगागे
गाय गरु के चारा ह सिराथे
गउ ठान ह सकलागे
नई मिले अब छपरी छानी
नईहे खदर के छाँव ।।
आबे आबे ग सहरिया बाबू
हमर गंवई गाँव।।
5
मिलजुल के हमर गाँव मनाथे
जम्मों तीज तिहार।
भेदभाव ह घुरूवा म पटागे
आथे सबके  काम।
खेलत कमावत दिन ह पहाथे
रतिया मया के छाँव।।
आबे आबे ग सहरिया बाबू ते
हमर गंवई गॉव।।
माधुरी डड़सेना
नगर पंचायत भखारा
छ .ग.
(Visited 18 times, 1 visits today)