गाय गरुवा के हड़ताल

गाय गरुवा के हड़ताल

हमरो बनय राशन कारड चारा मिलय सरकारी ।
सब्बो योजना ल छोड़ भर पेट मिलय थारी।
जब तक पूरा न होवय गरुवा घुरुवा अउ बारी ।
गाय गरुवा के हड़ताल रही जारी…….।

छत्तीसगढ़ के चारो कोती हामर हावय चिन्हारी ।
चाहे नेता चाहे बाबा चाहे ओ रास बिहारी।
लोटा लोटा गोरस पियय चारा के नइये पुछारी ।
गाय गरुवा के हड़ताल रही जारी …….।

कोनो बइठे मांझा डहर कोनो दुकान के दुवारी।
कतको ठोकाये गाड़ी घोड़ा अउ चिल्लाये नरनारी।
हमरो अर्जी पहुंचादव भैया सरकार के दरबारी।
गाय गरुवा के हड़ताल रही जारी …….।

पान चबावत फुरसत बइठे भटगांव रोड दुवारी।
हाथ जोड़ भागवत कहे अब उठ जा गऊ महतारी।
गाय कहे जब तक न बनय गाय आवास सरकारी ।
गाय गरुवा के हड़ताल रही जारी …….।

भागवत प्रसाद साहू भटगांव वि.ख.-बिलाईगढ़


Posted

in

by

Comments

Leave a Reply

Your email address will not be published. Required fields are marked *