भादों के अंजोरी म आगे तीजा तिथि – मनीभाई नवरत्न

भादों के अंजोरी म आगे तीजा तिथि

सूत बिहनिया उठके , मय करव अस्नान ।
पार्वती ओ मैंइया तोरे हावे मोला धियान ।
जइसन पाये तय अपन भोला भगवान।
वइसन पावव हरजनम, मय अपन गोसान।

लाली चौकी फबेहे, सुग्घर भुइयां भित्ति।
भादों के अंजोरी म, आगे तीजा तिथि।
आसन बिराजे हे, भोलेबाबा पारबती।
भादों के अंजोरी म, आगे तीजा तिथि।

सोला सिंगार करव, बरत राखव निरजला।
सवनाही गीत गावव, झूलव मय हर झूला।
हरियर साड़ी पहिरव, हरियर बिंदिया।
हरियर चूरी चमके, पाव म पइरी बिछुआ।

पूजा पाठ करव, मोर सुहाग तोर सती।
भादों के अंजोरी म, आगे तीजा तिथि।

गंगा जल मिलावव, कन्हार माटी म।
शिवलिंग बैठारव,  अंगना मुहाटी म।
रिद्धि सिद्धि गणेश हे, सखी संग पार्बती।
विधि विधान ले, मय ह करव आरती।

तांबा कलश नरियर, थारी म दीया बाती।
भादों के अंजोरी म, आगे तीजा तिथि।

~ मनीभाई नवरत्न , बसना, महासमुंद, छत्तीसगढ़