Tag: *लोक गीत

लोक गीत -उपमेंद्र सक्सेना

जाकी लाठी भैंस बाइकी, बाकौ कौन नाय अबु जनि है
कमजोरन की लुगाइनन कौ,दइयर तौ भौजाई मनि है।

ब्याहु पड़ौसी को होबन कौ, बाके घरि आए गौंतरिया
पपुआ ने तौ उनमैं देखी, गौंतर खाउत एक बहुरिया
बाके पीछे बौ दीबानो, औरन कौ बौ नाहीं गिनि है
कमजोरन की लुगाइनन कौ, दइयर तौ भौजाई मनि है।

जाने केते बइयर डोलैं, फाँसैं केती बइयरबानी
खेलैं चाल हियन पै अइसी, करै न कोऊ आनाकानी
अपुनी मस्ती मैं जो झूमै, बातु नाय काहू की सुनि है
कमजोरन की लुगाइनन कौ,दइयर तौ भौजाई मनि है।

आजु दबंग माल हड़पत हैं, आउत है जेतो सरकारी
केते तड़पैं लाचारी से, उनै नाय देखैं अधिकारी
भूलि गओ औकात हियन जो, बातु- बातु पै लाठी तनि है
कमजोरन की लुगाइनन कौ, दइयर तौ भौजाई मनि है।

काबिल अबु घूमत सड़कन पै, ऐरे- गैरे मौजु मनाबैं
सरकारी ठेका लइके बे, हैं उपाधियन कौ बँटबाबैं
मूरख हियन दिखाबैं तुर्रा, आपसु मैं फिरि उनकी ठनि है
कमजोरन की लुगाइनन कौ,दइयर तौ भौजाई मनि है।

अपुनी जुरुआ से लड़िबै जो, औरु मेहरुहन जौरे जाबै
बाको सबु पइसा लुटि जाबै, अपुनी करनी को फल पाबै
फुक्कन कौ तौ सबु गरियाबैं, कोऊ उनको काम न बनि है
कमजोरन की लुगाइनन कौ,दइयर तौ भौजाई मनि है।

रचनाकार -✍️उपमेंद्र सक्सेना
‘कुमुद- निवास’
बरेली (उत्तर प्रदेश)

होबै ब्याहु करौ तइयारी


चलिऔ संग हमारे तुमुअउ, गौंतर खूब मिलैगी भारी
राम कली के बड़े लला को, होबै ब्याहु करौ तइयारी।

माँगन भात गई मइके बा, लेकिन नाय भतीजी मानी
बोली मौको बहू बनाबौ, नाय करौ कछु आनाकानी
जइसे -तइसे पिंड छुड़ाओ, खूबै भई हुँअन पै ख्वारी
राम कली के बड़े लला को, होबै ब्याहु करौ तइयारी।

पहिना उन कौ भात बाइ के, भइया औ भौजाई आए
टीका करिके बाँटे रुपिया, घरि बारिन कौ कपड़ा लाए
गड़ो- मढ़ौ फिरि लगी थाप, बइयरबानी देउत हैं गारी
राम कली के बड़े लला को, होबै ब्याहु करौ तइयारी।

बाके घरै लगुनिया आए, ढोलक बजी लगुन चढ़बाई
बाने पहिले ऐंठ दिखाई, खूबै रकम हाय बढ़बाई
पइसा मिलै बाय कौ तौ बस, होय बहुरिया केती कारी
राम कली के बड़े लला को, होबै ब्याहु करौ तइयारी।

दाबत होय बँटैगो खूबइ, हियाँ कुल्लड़न मै सन्नाटा
आलू भरिके बनैं कचौड़ी, हलबाइन ने माढ़ो आटा
गंगाफल आओ है एतो,बनै खूब बा की तरकारी
राम कली के बड़े लला को, होबै ब्याहु करौ तइयारी।

नैकै दूर बरात जायगी, खूब बराती नाचैं- गाबैं
घोड़ी पै बइठैगो दूल्हा, जीजा बा के पान खबाबैं
निकरौसी जब होय कुँआ पै,पाँय डारि बइठै महतारी
राम कली के बड़े लला को, होबै ब्याहु करौ तइयारी।

रचनाकार ✍️उपमेंद्र सक्सेना एडवोकेट
‘कुमुद- निवास’, बरेली (उत्तर प्रदेश)